პიონი — სეზონი, ფერები, მოვლა და რამდენ ხანს ძლებს
პიონი ერთ-ერთი ყველაზე სასურველი ყვავილია: დიდი, ფუმფულა, სურნელოვანი და ძალიან ფოტოგენური. თანაც ხანმოკლე სეზონი აქვს, ამიტომ მისი ლოდინიც ცოტა დღესასწაულს ჰგავს. ამ გზამკვლევში მოკლედ აგიხსნით, როდის არის პიონის სეზონი, რამდენ ხანს ძლებს ვაზაში, როგორ მოუარო და რით შეცვალო, როცა პიონი ჯერ არ ჩანს.
როდის არის პიონის სეზონი
პიონის მთავარი სეზონი გვიანი გაზაფხული და ზაფხულის დასაწყისია — მაისი და ივნისი. ამ დროს ყვავილი ყველაზე დიდია, ფერი — ყველაზე სუფთა, ფასი კი ყველაზე ხელმისაწვდომი. სეზონის გარეთ პიონი იშვიათია და ძვირი, ამიტომ მაშინ კატალოგში მხოლოდ რამდენიმე პიონიანი თაიგული ჩანს ან საერთოდ არ ჩანს. სეზონის გარეთ ცუდ ყვავილს არ ვკრავთ და შენი თანხმობის გარეშე პიონს სხვა ყვავილით არ ვცვლით.
რას ნიშნავს პიონი
პიონს სიყვარულის, კეთილდღეობისა და ბედნიერი ოჯახის სიმბოლოდ მიიჩნევენ, ამიტომ ის ხშირად არის საქორწილო თაიგულში, ნიშნობასა და წლისთავზე. ვარდისფერი პიონი სინაზესა და რომანტიკას გადმოსცემს, თეთრი — სიწმინდესა და პატივისცემას, მარჯნისფერი კი — ენერგიასა და სიხარულს.
ფერები და ჯიშები
- ღია ვარდისფერი — ყველაზე პოპულარული: ფუმფულა, ორმაგი ყვავილი, რომელიც გაშლისას ხელისგულის ზომისა ხდება
- თეთრი და კრემისფერი — საქორწილო კლასიკა
- მარჯნისფერი — ნარინჯისფერ-ვარდისფერი ყვავილი, რომელიც გაშლისას ფერს ნელ-ნელა ღია ატმისფრამდე იცვლის
- მუქი ვარდისფერი და ბორდოსფერი — მდიდარი, თამამი ფერები მკვეთრი თაიგულისთვის
რამდენ ხანს ძლებს პიონი
კარგი მოვლით პიონი ვაზაში დაახლოებით ერთ კვირას ძლებს. ხშირად ის კოკრით მოდის და ეს კარგია: თბილ წყალში კოკორი 1–2 დღეში იშლება და ყვავილი უფრო დიდხანს ინარჩუნებს სილამაზეს. მთლიანად გაშლილი პიონი ლამაზია, მაგრამ მალე ყრის ფურცლებს, ამიტომ საჩუქრად ნახევრად გაშლილი ყვავილი ჯობს.
როგორ მოვუაროთ პიონს
- ღეროები ბასრი დანით დახრილად, 1–2 სმ-ით წაჭერი და ყვავილი მაშინვე წყალში ჩადგი
- ვაზაში ოთახის ტემპერატურის სუფთა წყალი ჩაასხი და ფლორისტის საკვები დაამატე
- წყალში მოხვედრილი ფოთლები მოაშორე — ისინი ბაქტერიების გამრავლებას უწყობს ხელს
- წყალი ყოველდღე გამოცვალე, ღეროები კი ყოველ ორ დღეში ერთხელ ხელახლა წაჭერი
- თაიგული გრილ ადგილას დადგი, მზისგან, რადიატორისა და ხილისგან (განსაკუთრებით ვაშლისა და ბანანისგან) მოშორებით
თუ კოკორი დიდხანს არ იშლება, ღეროები თბილ წყალში ჩადგი და ვაზა რამდენიმე საათით უფრო თბილ ოთახში გადაიტანე. გაშლის შენელება კი, პირიქით, სიგრილით შეიძლება. ზოგადი რჩევები ნებისმიერი თაიგულისთვის წაიკითხე ჩვენს გზამკვლევში „5 შეცდომა, რომელიც თაიგულს დროზე ადრე კლავს“.
რით შევცვალოთ პიონი სეზონის გარეთ
მსგავს რბილ და ფუმფულა განწყობას ქმნის ბაღის ვარდი, რანუნკულუსი, ჰორტენზია და ეუსტომა. სეზონის გარეთ ფლორისტი ამ ყვავილებით ისეთ თაიგულს შეგიკრავს, რომელიც პიონის თაიგულს ფერითაც და ფორმითაც ახლოს იქნება.
პიონი ამელიში
სეზონზე პიონიან თაიგულებს პიონების კატეგორიაში ნახავ, პიონს კი ხშირად სეზონურ მიქსებსა და კალათებშიც ვამატებთ. თუ პიონი კონკრეტული თარიღისთვის გჭირდება — მაგალითად, ქორწილისთვის, — დაგვიკავშირდი წინასწარ: +995 592 064 064.